बागमती प्रदेश मुख्यमन्त्री बहादुरसिंह लामा राजीनामा दिन तयार

भक्तपुर । बागमती प्रदेश मुख्यमन्त्री बहादुरसिंह लामा राजीनामा दिन तयार भएका छन् । पार्टी सभापति शेरबहादुर देउवाको निर्देशनपछि उनी राजीनामा दिन तयार भएका हुन् ।

संसदीय दलको निर्वाचनमा प्रदेश सभापति इन्द्रबहादुर बानियाँसँग पराजित भएका लामाले सभापति देउवासँग भेटवार्ता गरेका थिए । बुढानिलकण्ठ पुगेका उनलाई देउवाले सिधै ‘लफडा नलम्ब्याउनुस्’ भनेको बताए ।

केही दिनअघि संसदीय दलको नेतामा निर्वाचित भएका नेपाली कांग्रेस बागमती प्रदेश संसदीय दलका नेता इन्द्रबहादुर बानियाँले लामालाई राजीनामा दिएर मार्गप्रशस्त गर्न आग्रह गरेका थिए ।
बानियाँले बिहीबार बिहान सञ्चारकर्मीसँग कुरा गर्नुहुँदै मुख्यमन्त्री लामालाई हठ त्यागेर मार्ग प्रशस्त गर्न आग्रह गरेका हुन् ।

‘उहाँले संसदीय दलको नेताबाट विश्वास गुमाइसक्नु भएकाले नैतिकताका आधारमा मार्ग प्रशस्त गर्नुपर्छ,’ आफ्नो र मुख्यमन्त्री लामाबीच मनमुटाव नरहेको स्पष्ट गर्दै नेता बानियाँले भने ।

‘हिजो म बुढानीलकण्ठ गएको थिए, सभापतिज्यूलाई भेटेर मैले मेरो कुरा राखेँ,’ लामाले बताए, ‘उहाँले लफडा धेरै भयो, नलम्ब्याउनुस् भन्नुभयो, जनताको काम गर्नलाई पदमै बस्नुपर्छ भन्ने छैन कुरा भयो ।’